Marco: Opinyon!

Bakit ka lilisan?

Walang iwanan sa bayan ni Juan, ito ang madalas sinasabi ng mga kababayan nating Pinoy. Pero ngayon, bakit halos lahat ng ating mga kababayan ay nag-alisan na sa bayan kinalakihan? Isang pagbabago ang nangyayari sa ating mga kababayan pakiwari ko’y dahil sa pagbabago ng pagpapatakbo ng sistema ng ating bansa. Sistemang hindi makatarungan ayon sa ating mga kababayan. Tulad na lang ng pagtaas ng bilihin sa market. Pagtaas ng singil ng kuryente, pagtaas ng presyo ng gasoline at kung anu ano pa… buti na lang ngayon medyo bumaba ng konti ang mga pamilihin at iba pa. Pero ganon pa rin… minsan tumaas at minsan naman nagrorollback. Nakakaloko ang mga negosyante… grabe!

Suliranin na hindi magawan ng paraan ng mga kinauukulan. Ano nga ba ang dapat gawin? Paanong hindi iiwan ang bayan kung ang sistema ay hindi kaayaaya sa mata ng mga mamamayan? Tulad ngayon, malayo pa ang eleksyon pero ang iba nating mga nasa itaas tila abala na sa pagpapabango para mapansin ng sambayanang Pilipino. Kung anu ano nang paraan ang ginagawa nila para lamang mapansin. At ang iba’y tila pinag-uusapan na kung sino ang tatakbo bilang bagong manglilikod. Haaayyy… ganito na lang ba palagi!

Wala namang gustong iiwan ang bayan na kung saan dito tayo lumaki at namulat pero sa sistema ng pagpapatakbo nito. Maraming dahilan kung bakit lilisanin ang bayan kinagisnan. Isakripisyo ang lahat ng maiiwan.

Talagang ang ibang kababayan natin ay nagpupursige na makaalis sa sariling bayan upang maiahon sa hirap ang kani-kanilang pamilya. Para sa kanila, ito lamang ang paraan upang matustusan ang pamilya na naiiwan dahil kung hindi pare-parehong maghihirap at walang makakain ang bawat isa.

Pero sa panahon ngayon, paano na ang mga pangarap ng ating mga kababayan kung halos buong mundo ang hinaharap ang tinawag nating pandaigdigan krisis ekonomiya?

Matupad pa kaya nila ang mga minimithi nilang pag-unlad kung halos lahat ng mga kompanya ay nagsasara at nagbabawas ng mga manggagawa. At ang iba pa nating kababayan na nasa ibang bansa ay pinapauwi na dahil nagbabawas na nang mga tauhan ang kompanyang pinagtatrabuhuan nila. Paano na ang umaasa sa kanila?

Alam naman natin na mahirap mawalay sa ating mga minamahal sa buhay pero kailangang magsakripisyo alang-alang sa kinabukasan ng lahat. Pero dahil sa krisis ekonomiya, paano na ang mga pangarap? Makakaahon pa ba? Makakaraos pa ba?