Sapagkat Malayo Ka

Malamig na ang simoy ng hangin pagsapit ng madaling araw, mararamdaman na ang lamig ng hangin na dumadampi sa ating balat. Sa umaga, maririnig natin ang mga kanta na nagpapaantig sa ating mga puso lalo na kapag tayo’y malayo sa ating mga minamahal. Ito lamang ay nangangahulugan na ang kapaskuhan ay papalapit na.

Ngunit, paano nga ba natin ipagdiriwang ang Pasko? Hindi ba’t pagkatapos ng ika-1 ng Nobyembre, ang ibang tahanan ay may kanya-kanya ng sabit na mga malalaking parol na siyang simbolo ng Pasko at itatayo ang mga naglalakihang “Christmas Tree” at mga ilaw na siyang nagbibigay liwanag o buhay sa mga ito. May mga naghahanda na para sa noche Buena. Ang iba nama’y inumpisan ng mamili para pang-regalo sa mga inaanak at sa mga mahal nila sa buhay at syempre hindi mawawala sa atin ang simbang gabi. Ganito natin ipagdiriwang ang Pasko.

Ano nga ba ang kahulugan ng PASKO? Ito ay simbolo at respeto ng kapanganakan ni Jesus. Marami sa atin ang nagsasabi na ang kahulugan ng Pasko ay pagmamahalan, pagbibigayan, pagpapatawad sa mga nagkasala sa atin, pagkakaisa at pagtutulungan ng bawat isa sa atin. Pero sa Pasko lang ba natin ito gagawin? Hindi ba natin pwedeng gawin ito araw araw?

Sinasabing pasko naman kaya dapat magpatawad, dapat magbigayan, dapat magmahalan, at dapat magkakaisa ang bawat pamilya at gawing masaya ang araw ng Pasko. Pero pagkatapos nito’y ganon pa rin ang mga pag-uugali at ganon pa rin ang treatment ng bawat isa. Nasaan na yong sinasabi nating pagmamahalan, pagbibigayan at iba? Pwede naman natin itong ipagpatuloy kahit hindi Pasko, di ba? Kahit hindi Pasko dapat magmahalan tayo, magkaisa, magbigayan, magtulungan tayo at kahit hindi Pasko gawin nating malinis ang ating puso.

Sa Pasko, madalas natin mararamdaman ang pangungulila sa ating pamilya, kapatid, kaibigan at sa mga taong nagpapasaya sa atin lalo na kapag nasa malayo tayong lugar. Isa na rito ang mga taong nagtatrabaho sa ibang bansa, ramdam nila ang lungkot sa kanila mga puso sapagkat hindi nila makakapiling ang mga taong malapit sa kanilang mga puso. At yong iba naman kahit sa araw ng Pasko, nagtatrabaho pa rin para sa kanilang pamilya at para maibigay ang kanilang pangangailangan. Sabi nga ng karamihan, hindi daw nila maramdaman ang pasko dahil nasa ibang bansa sila. May mga bansa kasing hindi nagdidiriwang sa ganitong kasiyahan o pagdiriwang.

Para sa mga bata, na-appreciate nila ang pasko lalo na kapag bibigyan mo sila na kahit maliit na aguinaldo tuwang-tuwa na sila. Pero sa mga taong malayo sa kanilang pamilya tiyak pagkalumbay ang kanila nararamdaman sapagkat nasa malayong lugar sila upang makipagsapalaran dahil sa hirap ng buhay dito sa ating bansa.

Para sa ating lahat, Maligayang Pasko at nawa’y patnubayan tayo ng ating Panginoon.